وبعدين مع الخطباء والوعّاظ؟!! فقعت معي

عنوان مزعج بس الأكثر إزعاجا هو الخطب المتكرّرة من خطباء يوم الجمعة واللّي مع الأسف لا ترقى للمستوى المطلوب فهي تنقسم إلى التّالي:

1. خطب المناسبات الدينيّة والمواعظ
2. خطب إعطاء الأمل وإبر التخدير وبأنّ النصر قادم
3. خطب القصص القرآني
4. خطب التهييج العاطفي واللعب على الحس الديني

وبعدين؟ عن جد وبعدين؟ لمتى هاي النوعية من الخطب اللي يا إمّا سمعناها ألف مرّة يا إمّا إنّو تأثيرها ما يدوم سوى بضعة ساعات، أيّام أو أسابيع وبعدين بترجع ريما لا عادتها القديمة.

يا شيوخنا وخطباءنا هاي الأمّة بدها بناء من تحت لفوق كل الأسس عنّا خربانة وحتّى عندكم إنتو كمان، الشيخ بقولنا هديك اليوم إنه الرّسول إنسحر وشيخ تاني طلع على التلفزين بقول لو إنسحر لبطل القرآن لأنّ الله كفل حماية النبي "والله يعصمك من النّاس" وطول عمري بعرف إنّه عقوبة الزّنا للمحصن الرّجم حتّى الموت وطلع فالأخير إنه هادا الحكي مشكوك فيه وبقوة على أساس إنه في آية بالقرآن نسي يحكيلنا عنها النبي شو هالخربطة هاي كلها.

كله بده تزبيط وإعادة بناء وترتيب يا إخوان إنتو كيف بدكم النّاس تصلّي الفجر وهيّ شويّة قواعد وآداب طريق أو شارع ما بتلتزم فيها بسكروا الشّارع عشان الصلاة وعنده إستعداد يعمل مليون حادث عشان يلحّق الصلاة أكيد في إشي غلط.

كيف بدّك إيّاني أصدقك وأصدّق إنو المصاري إللّي أنا بحطها بصندوق الجامع بتروح للأرامل والأيتام والمساكين وعلى باب المسجد صارلي بشوف نفس الشحّادات والشحّادين من 3 سنين وأكتر؟ ماهو إذا همه محتاجين وإنت ما بطعطيهم فإنت حرامي أو إذا همه مش محتاجين وإنت ساكت عنهم فإنت ساكت عن الحق وبتخلّيهم ينصبوا على كل هدول النّاس اللّي طالعين منم المسجد؟ ليش ساكت خايف ولا شريك ولا شو؟

بيّاعين الخضرة وسوق الجمعة بمساعدة المصلّين نفسهم بقلبوا الشّوارع مزبلة ورغم إنه حرام البيع والشرا في وقت الخطبة والصلاة بس شو البيع والشرا على ودنه

إحنا خربانين من جوّة هاي الصدمات والإبر بتساعد شوي ولوقت مؤقّت وبعدين بروح تأثيرها إحنا لازمنا إعادة بناء وإعادة تأسيس للدين والشريعة وإلا إبقى قابلني إذا فلحنا

يا جماعة الشيوخ والوعّاظ بدك تشتغل علينا زي كإنا لسّاتنا عمرنا أربع خمس سنين من أول وجديد وعلى أسس صحيحة ويا إخوان مشان الله هاي الأمور الخلافيّة حلوها عاد بكفّي بعبصة بعقولنا ومشاعرنا الواحد قرّب يطلع عن دينه