للي قالته ليلى ... ما فقعت معي

كم أحب أن أسمع عن الربيع العربي الذي أضحى خريفا في نظر الكل، لقد أغفلت الناس الحقيقة الوحيدة أنه لا وجود للديموقراطية حتى في الدول المتقدمة فهو كأن أخيرك بين أن تموت شنقا أو تموت غرقا ... حبايبي كلها موتة وآخريتها قطنة بتندحش في مؤخراتنا زي الخوازيق اللي عم ناكلها بشكل شبه يومي.

لا تقل أنا حر فلست كذلك أنت عبد فإختر من تعبد هل هو الله، المال، صاحب السلطة، الكرسي، الرغبة أو الحياة. لا وجود للحرية فحتى الحرية مقنّنة ولا تقل أنا ديموقراطي، حارتنا ضيقة وبنعرف بعض فش منه هالحكي لأنّك زي اللي ببيع مي في حارة السقايين.

لست حرا ولا أنا نحن محتلين بلقمة العيش ومتطلبات الرفاهية فطالما نحن كذلك فلا كرامة ولا حرية، كم أتمنّى أن أتخلص من ملف المصاريف والمدفوعات وأن أحيا كإنسان وليس كماكينة صراف آلي من أجل الأكل والبيت والمدارس و و و يا جماعة حتى شمة الهوا بمصاري وهاد هو مربط الفرس --- المصاري، أنا راض أكون ثور في الساقية وأحرث الأرض بس يا أخي لما تطعميني شبعني أنا وولادي، لما بدي أواديهم على مدرسة محترمة فش داعي أشلح أواعيي وأعيش بالدين لما بدي أسكن بيت فش داعي أبيع اللي وراي واللي قدامي.

لا يوجد حرية... فأنا عبد المأمور (لاحظ مأمور) مين اللي أمره وهل اللي أمره مأمور كمان؟!! طب مين الآمر الناهي؟ّّ!! أنا والعياذ بالله وللأسف أشرك بالله، أكيد وأنا متأكد إنه معظمنا هيك ويا ريت شرك محرز (أيام زمان كانوا هبل واللات والعزى) ولكن الآن شركنا يتلخص في (مصاري، شغل، مدير، أطفال، تلفزيون وإنترنت). سامحنا يا رب بنصلي الفرض على عجالة لأنه في مليون شغلة نخلصها أولى من الصلاة من وجهة نظرنا.

جماعتنا عاملين قصة لتحرير الإنترنت، نيّال إمي ولكم ميين فيكم حر أصلا ما إحنا عارفين اللي فيها بلاش نكذب على بعض، الموضوع كله مصاري، لو الحرية لهاي الدرجة مهمة كان حررتوا الأقصى يا .... منك إله أقلك روح حرّر حالك أوّل إشي. وبستذكر هلق أغنية لسيّد درويش "أهو دا اللي صار". يا حبيبي، إنسى الموضوع وخليك في حالك حتقول عني متشائم وقوى شد عكسي يا سيدي أنا هيك، روح على الساقية تبعتك وبلش لف فيها بكفي هبل.

الحرية موضوع لن يتحقّق في يوم من الأيام حتى ندرك أنّنا لسنا أحرارا أصلا وأن الحرية حلم جميل فليبق كذلك ولكن لا تحاول تحقيقه لأنه لن يتحقّق لأنه مجرّد حلم وأنا مقتنع أنّ دورنا في هذه الحياة أن نستعد أو أن نعد الأجيال القادمة لتقوم بما لم ولن نستطيع القيام به. بالله عليكم الشباب والصبايا اللي بنشوفهم كل يوم هاي ناس فيها تحرّر إشي غير أزرار القميص وحزام البنطلون عشان نص ....ه تبيّن أو عشان تورجينا هي الجي اللي لابسيته.

شكلي خبّصت بس كان لازم أفش غلّي لأنه هيك مزبطة بدها هيك ختم وإحنا أكتر إشي بطلعلنا هو إنه نشكر هالوطن على إنه لسه راضي فينا كمواطنين.

عزيزتي الحكومة ومن يكون الآمر الناهي، أنا رضيت وبصمت بالعشرة، أنا ثورك وتراب كنادر الوزراء واللي أعلى منهم على راسي من فوق بس لو سمحتوا لما تدعسوا على راسي خليكم حناين مش عشاني لو علي للي قالته ليلى بس عشان هالبنتين ذلّوني وكسروا ظهري وخضّعوني، ويا ريت تخلوا راسي برة الطين عشان أشوف ضحكتهم لأنها هي اللي مسكتيتني ومش مخليتها تفقع معي.